-Paulianhang MA (Socio.) JNU, New Delhi


1. Kristian sahkhuo in hoina tampi a'ngtut mabangin hoilouna zong tampi a'ng tun hi. Vangphathuoi i chi diei vangsiethuoi i chi diei, i nam/i gam a kristian biehna ahing lut apat I khotang hinkhuo ban ah I tawndan uh nasatah in a'ng kilamdangta hi. Ipu-ipa tawndan thupite I nelsie pan ta ua,tuni in khangthate'n bangma tawndan luite i theita sih uhi. I gam a missionary masate'n kristian gindan ahingna zuisah uh thamlou in amau tawndan zong a hingna zuisah uhi. Tuni a kristian tawndan a i ngaituo, I ngaithupi khenkhatte West lamte tawndan ana hizaw leng hi.

2. Tampen bangma dang zieh hilou in, missionaryte'n Pasien thu a mitvahna ahing puoh uh maimai hilou in, I gam I nam khu a hing na uhh(vaihawmkhum) ut uhi. Missionary a hing kuon khenkhatte zong tualai a solkar agent ana hi uhi. A thuthu uo hing umsah a, hing vaihawmkhum theina ding un Pasien thu tungtawn in, amau tawndante ahing na sinsah uo, ei tawndan pouma Pasien thu toh kikal chi'n ahing nuolpieh uhi. Missionary masa te'n ahing na zawthaw taseng uo, tuni chieng tan in ahing thuhilnate uh i sumkuong chiengpe nalai uhi. Bible gen leh deidan te sângin amau hing na thumopte i ngaisang ua, I zui ut zaw ta uhi.


3. Christmas sa toh bawllou chienga thupi salou, zu leh kristian kigâl (enemy) mawng mawng ahi chi ngaidan(Zukham ahoi kachi tuom sih), Pasienni a bieh-inn kailoute vangam lutlou ding leh Pasien thu hatlou dana, ngaidante, Pupa dân a kitengte (married) dân pulang a koi nate leh a dang dangte khu ahing na thumop dan ahi zieha tunia i lungsim a luodim ahi ding hi. Tuate apat kikeptup/kihepkhieh pen true/pure Christianism dan in, i koi pawngsan ta uhi. Tualou ah, Mothers' Day, Fathers' Day, Childrens' Day chite I ngaithupi mama ta mawh uhi. Tam nite leh I kristian biehna in bang e kizopna anei? Chi zong ngaisut tâh ahi. Tam Nite khu ei kristian biehna apat hing kuon ahi sih a Western countries lam apat hing pawtdoh ahizaw hi.

4. A tawpna ah British 'Divide and rule' policy in i lah uoh,adiehin ei Zou sungah nasatahin, tuni tan ma asawn zing in kamu hi.Bangma dang hilou in I ginna uh/I biehna uh tungtawn in eite khat-le-khat I kigâl(enemy) et ta mawh ua, dahhuoi mama kasa hi. I gam a kristian hing lut kipahhuoi nanleh kipohhuoi sih. Bangteng hileh silzousie ahoina ahoilouna um mawng ahia, a lâhdan/zahdan siem khu khantouna ahi zel hi. I zah siem leh kipumkhatna leh nam khantouna ahing tut ding hi.

[Source: Zokuam Thawn, July 2004- Editorial]