ZSP Hqtr. in October 2008 chiang in Golden Jubilee thupitah in lop ding vaiguan nei a, hinanleh tamthu tawh kisai thu ging apat in kalungsim a thu khat aging den hi. Namdang te Student Organisation te tawh ZSP ka enkah a, mite’n bangjat achievement anei y? ZSP in bangjat anei ei? A history te ka enkah hi. ZSP ichi chiang in Zou sung ading a apex student body ahia, hinanleh student te ading in Golden Jubilee tan atung tan in jong a nasep/plan a sepkhie khatbeh muding kathei sih hi (ka theilou ahile anyone tell me please).

Student body ngaisah malah in ama leh ama jong ki enkol joulou in tamveipi ICU (Intensive Care Unit) ah ana um hi. WHY! Tuathamlou in Golden Jubilee tawh kituah in Hqtr lamkai te’n ZSP Jubilee Theme ding khat beh hing phuang va uh kana chi sim le tunitan bangma zah ding a umsih a, Jubilee ni ngahla a sim leh mal a ikhuang vengvung uh chilou bangma muding theiding a umsih hi. Jubilee tawh kituah in Student organization khat ihisam leh Literacy lam bang pibawl in Theme in nei lei aphatuam de aw chi ngaidan bang kanei hi.

Bang pen e ilop ding uh? Bangpen e ikipahpi ding uh?
ZSP sep leh bawl lawm vai in kipah vai chi lei lah bangma muding a umsih ngal a, buaina bangma umlou a Golden Jubilee tan ipawlpi atung zou chilei lah ei leh ei kihem isuah jel ding a, azieh pen buaina ana um ahi zieh in. Pasian kung ah ZSP buaina te kawmkal a kum 50 tan nahing puitung chia kipahthu igen ua ilop ding uh chilou ngal lop ding leh kipahpi ding bangma um kasa sih hi. Tualeh thupitah a lop ding ZSP in bangma achievement aneisih hi. Bel hawm (Empty vessel) maw ilop ding uh ! Tuabang lopna ding in budget tuajatpi pammai nasa sih uh ama, igam a kiel leh genthei hun tambang laitah a sum tuajatpi bangma lou a nopbawlna maimai a nikhat ninih a imawh zahbei ding uh pammai na chiang um kasa hi. Golden Jubilee melmu bang inei y? A Jubilee suang leh souvenir maimai tawh lungkim nalai ding ihi uh ama. ZSP in Zou Sangnaupang te ading in bangma bawlthei neilou leh bawl sawmlou ama. Hun peisa te ah bangma ana bawlsih nanleh Jubilee kum ahi tawh kituah in tukum beh in Sangnaupang te phattuam na ding khat bawl leh hoi nasa sih uh am?

Bang pen e ZSP Hqtr mawpuahna leh sepding a silhoi?
Hqtr khat ahi buang sam leh Block leh Branch te tawh kichimatna(relation) siam hoi henlen, Branch umsun Shillong leh Delhi lam te tawh Jubilee kum ahi tawh kituah in relation tha siem henlen, ngaidan deidan kikup dialdial hun neileh silhoi ahi. Hqtr in ama deidan, Branch ten amau deidan chia sil apei zing zieh in khantouna hatlou ahi. Pangkhawm hatna ahizing hi chi manghil sihvai. Tualeh nampi student body khat ahi buang samleh literacy lam jong ngaisah deuleh deihuai hi. Pawl Sawm exam dingte coaching maimai tawh bangtanvei lungkim ding ihi y? Zodawn lam ah govt. skul hunkhop a um a, tualeh hattuam mission skul jong hunkhoptah um hi. Tamte khatvei beh ZSP Hqtr in vehna nei henlen Lamka tan jong hing tung joulou sangnaupang tampi te laisim na va entup le uh bang asiatna a um diai. Govt. skull leh mission skul te ah thu vanei uhen kachi na ahilaijang sih a, amabou va enkhie uhenlen sangsye te nasep dan ahoi nai ahoi sih ei, hichijaw deuleh chi ngaidan leh deidan vakum le uh phatuam in sangnaupang tampi ading in jong encouragement hoitah hiding in kagingta hi. Silhoi ahia, tua silhoi khu govt. leh hattuam ten jong dal ding un kagingta sih hi. Amau ading a jong phattuam ding ahiman in, ahin ahing dal tah uleh jong kihou dan khat chu a um ding hi. Tam pen ZSP mawpuahna hisih nachi maithei, ngaitua tha in ei leh ei iki entup lou leh koi in hing ettupsah ding. Govt in skul hing peta ei ma in iki entup lou leh govt in hing entup sah lou ding a, sangsye te’n semlou in sum lazel ding ua, ei leh ei kihem isuah mai ding uhi. Bangtan vei ei leh ei kihem nalai ding ihi y? I gam a skul te iki ettup leh azal zou ding tu eima ihi. Zodawn a skul te hoitah in pua lei neilou sa leh hahsa sasa in Lamka ah sangnaupang te ahing pei uh ngailou ding hi.

Golden Jubilee hita buang sam a, ZSP in Lamka beh a Sangnaupangte ading Hostel neu khat beh anei hunta hilou ama. Tuni a nikhat ninih Golden Jubilee hawmpi lopna ding a ikiphal leh thalop bang un kumtampi dai ding leh sangnaupang hunkhop phattuam nading silte ah kiphal in kithalop hilei bangza in inam ipawlpi akhangtou diei, na ngaisut ngai ei? Koi ta phattuam na ding kibawl sih nachi maithei, tam thugual(sentence) mama ahi ikhanmawbawh uh. Tuni a aneijou pen, aseng joupen nahi vang in natu nata khang a bang dinmun ah a um ding y chi namu ngel ei? Khovel khu kipei in kilumlet zing ahi chi manghil sih vai. Nikhat ninih pallun te tawh buai non sih vai in hun leh kum tampi daiding sil phatuam te ah atha in hanchiem chiet vai.

Tuaban ah, Zodawn a iskul te uh aginat lou vang in tuate apat hing khangkhia a pawl sawmzou hing pass hunkhop um gige hi. Tuate innsung hahsa tamkuam jong um ua, pawlsawm ban a ding hahsa sa mama nu-leh-pa tampi um ding hi. Tua bang hahsa te a ding ZSP Hqtr in scholarship khatbeh inei uh hunta hilou maw. Zou MIL a mark mutam penpen te cash award ipieh utawh lungkim nalai ding ihi y? Award tuam tuam te tawh lungkim ngetngut nalai ding maw. Inn sung hahsa pawlsawm ban sunzom jou nonlou te a ding khualna a scholarship khat nei silhoi leh khantouvai mama kasa hi. Tampi hisih nanleh admission fee leh tuition fee beh achin leh jong ahun khop hi ikipatna ding uh. Tuabang tuah ding mikiphal umlou ihiai, ahilou leh ZSP in tuabang angaisut lou zieh a umlou? ZSP maimai jong hilou in ZLS leh hattuam te’n jong tam bang nei le uh hattuam mi jong pung in mipite phattuamna jong ahiding hi. Pasian nasem jong ihi veve uhi. Hattuam te’n jong eima innsung a Pasian na semlou in mi innsung ah isep sawm zing ua, eima innsung a meikhu peisuah ding gel lou in mi innsung a meikhu umzing nading ibuaipi uhi. Mangzing gammial ichi zing uleh Zodawn koizaw ipoimaw ngai zawh y? Hattuam te’n koi zawh panpi na in budget ah sum aseng tam zaw y? Ei leh ei iki panpi lou le koi in hing panpi ding? Hattuam te’n Sawm akhat ingai poimaw bang un I hattuam mite leh inam mite hahsatna te ngaipoimaw lei igam inam khangtou ding hi. Gammial iveinat nalam un eima innsung a khomial lam imu nonsih uhi. [Tam tawh kisai lam tazah in hunsah vai nalung lut leh ‘Economic Drain of Wealth: All out and no In’ chia hattuam te nasep tawh kisai a ka article sawtlou in tam mun ma ah ahing tuang ding a ana sim mai tan aw.]

Tuazieh in Golden Jubilee melmu in lamkai te’n bang e sangnaupangte ading a sil phattuam ding khat hing ngaitua le uh kumsawt a Jubilee melmu jong ahi ding a inam leh sangnaupangte phattuamna jong ahi ding hi. ‘Better late than never’ chi bang in bangma akikhel nai sih a, bangma lou sang in bang ekhat a hoijaw nalai hi. Bawl lou sang in jong bawlkhiel/lawsap ahoijaw nalai hi chi ngaitua tha va ui. Atawpna ah, Golden Jubilee Pawi tawh mitsuh kialou ding in hanchiem chiat vai, Jubilee a ding a ikithalop bang un mailam hun ah jong kithalop zing chiet vai. Mailam hun ah ahithei tan in ZSP pen ICU ah koi da hamham sawm ta vai e guai! KALAISAI !

Ei leh ei kipanpi sih lei koi in hing panpi ding
Ei leh ei kitawsawn sih lei koi in hing hanthawn ding
Ei leh ei kihem sih lei koi in hing hem ding
Ei leh ei ki entup sihlei koi in hing entup ding
Ei leh ei ki dou sih lei koi in hing dou ding
Ei leh ei ki gense sihlei koi in hing gense ding
Ei leh ei kidem sih lei koi in hing dem ding
Ei leh ei…………………………….

Thou in, Kuan in, Sem in
Ilouma kibang, Sisan in zong chin leh tuai ihi.