(THE ELEVENTH COMMANDMENT)

     Pasian in Mosi kung ah Thupieh Sawm (Tenth Commandment) ana pia a, tunitan in Kristian te’n izui leh zuilou pen thutuam hitaleh ijang nalai uhi. Tuni’n ei Lamka mite a ding in Thupieh Sawm-le-Khatna (Eleventh Commandment) neibe lei hoi kasa hi. Tam Thupieh Sawm-le-Khat na ding ahile

VOTE ZUAH KEN/VOTE JUAH SIN

chi ahi.

     Tulai sang in 1980s lai in igam ana khangtoujaw mama hi’n kathei hi. Kakhua uh Zoumun (Lamka apat 7km vel) tan ah Electric meivah gui leh Telephone gui hoitah in a um a, telephone nei jong khat leh nih ana um hi. Tualeh ka khua uah street light chidan deu in lampi ah um hi. Tuni’n street light, telephone gui gentahlou a khuam(post ) maimai zong muding um nonlou a, nikhat (dahkal 24) sung in dahkal 26 sung load shedding umthei a, load shedding umlou hun sung Black Out hinailaiset hi.
Nidang in Lamka leh Zokhopi Singngat kikal kikuamtua na nuam mama hi. Nikhat in Bus service thumvei zel – zingkal, suun leh nitah ana um a, Zoumun/Geljang apat in zong thumvei zel ma bus service ana um hi. Tualeh akhua khua in amau Bus service jong ana kinei uhi. Tu in Bus muding um nonlou a, Shaktiman, Tata chite’n vanpuah thakhel in mihing apaw ta valong uhi. Gam hausate’n Voh-eh puah nading a zong adei nonlou uh garite eite niteng khualzinna ahitamawh a, dengdel in zauhuai mama hi. Tamte hawmthaw in khuai bang in ituamdim nalai set uhi. Kazaauuuu!! Nidang in igam India Pawi thupi – Republic Day, Independence Day chite hunnop khat anahi in Zodawn lam apat Bus teng dimlet in Lamka lam ah mipi kitawllut hi. Tu in tam Pawi thupi nite ah koima innpu pawt ngam um nonlou abang ta hi. Khovei peidan et in lah gam khangtoujaw in inam in jong masawnjaw thamta hileh kilawm ngal a, tua hunlai in mobile phone bang e chi jong kitheilou a, computer genlou TV jong atamjaw Black and White ahi nalai hi. Tu in Mobile chite naupang kimawlna isua ta hi. But igam un tua hunlai a facility aneite neinonlou mawh ! Bang chidan ata diei? Kikhangtoujaw bang napi in ikhantouna uh muding tamlou hi.

  Tamte teng khu koi mawhna hiva nachi ei? DC pu, MLA pu chite mawna adiei, KOI?

    VOTE neithei kahi apat khatvei maimai VOTE kakhekha pan hi. Tuajou apat in kei khieh ngai sese lou in ka Kuli(coolie) te’n kei thei lou kal in anakhe vachet ta uhi. Kizen vanglah, nisa thuah a queue a din ngailou, lupna tung a ilup hiuhiau lehzong I VOTE ana kikhe thou ! Underground ichi uh e singneimi ichi uh e nam sepia ichi uh e te’n voting booth teng capture ua, amau’n a capture lousun chieng in a capture tute vengbit in pang nalai set uhi. Mipi nasem tahzet chu ahinave ua, maw! Tambang a mipi nasemte a damsawt uleh igam maban ding lungdon huai hi. Nam sepia kichi ngal ahi uleh igam viahawm dingte teelna khu asiengthou thei na ding, mipite’n zauthawnglou a amau mimal deitelna bang chiet a VOTE akhieh theina ding un pan hing la le uh deihuaijaw hi. Tualeh, election hun chieng in sum chu vasa leng bangmai a leng in mun teng ah atuthei hi. Gam leh nam nehtum ding ngaina te’n a mimal, pawl, innkuan leh khosung youth club tungtawn in I VOTE uh ahing dawp pan ta ua, eite jong lah chu sum mai a tai vawtloute ihi man un, koipen kung ah ka VOTE tam kakhawng thei ei chi’n nga gulau ibang mai uhi. Ikiletsah thei hunpet ahi man in ikiliensah chiet ua, secondhand dukan a puan lei ding bangmai in deh chitah in ikideh uhi. Candidate te’n atawmtheipen a lei ut, eite’n atamtheipen a zuah ut. Khenkhat te bang in a VOTE juahna uapat in Sawm-a-khat penailai set uhi, Pasian akipah na nel diei aw ! Hun tomkhat sung chu I VOTE zuah na sum tawh nuamsa in Zu-leh-sa ne in nop isa mama ua, election result suah nailou in igenthei uh ahing kipan kia pai ta hi. I VOTE(voting rights) eima mimal min, India Daan Bupi sung a eima mimal deitelna bangjel a khieh ding chi hinanle, I zuahsa ahiman in atung ah thu ineizou non tasih a, ei vakhieh zong poimaw khollou in ama leh ama ana kikhe thei ta hi. Election result ahing suah a, eite ading in bangma akikhiehna a um tuam sih hi. MLA chingpa chu bawlfuh kisa in anui nui tamai a, ka sumpi teng ka ditkia na ding nehguh thei fund bang bang a um ei chidan deu in innmun ah jong a um man non tasih hi. Ama a ding in jong I VOTE te uh aleiman sumpi mangthai mai theilou ahiman in aditkia chu aloutheilou ahiman in tua ditkia nading in kum 3 vel alut a, tuakal in igam uchu vutvai khu kitung den in amiel khepkhup ta lei ngailou powder munteng ah muthei in a umta hi. Eite’n ideitelna, igam leh nam zuun ding a iteel uh ahisih a, sum tam hing petu ahiman a ina teel uh ahizawhzieh in bangma igen thei nontasih ua, ithuah mai uh chilou koima kamteng khat keh ngam jong a um non tasih hi. I VOTE zuah man uchu Israel te’n gamdai a Pasian gawtna athuah bangmai un kum 5 sung genthei ithuahlaw ta uhi.

    Tunia igam inam genthei jieh khu koima dang mawhna hilou in nang leh kei duhgawl jiah, nehguh jieh, sil dihlou penpen ibawl jieh uh ahijaw hi. Election chieng in VOTE zuah sihlei, iMLA te kung uah I ut ut un iphun thei ding ua, siengthoutah a ina teel uh hileh ikinepna bang ua na aseplou chieng un kithutuahtah in imawpai un, ipaikhie thei ding uhi. Kristian kahi chin ikiletsahpi ua, hinanleh Kristian te bawl ding a kilawmlou ibawl leng uhi. Mosi in Thusawmpieh alahlai in tulai bang a election um hileh Pasian in ‘VOTE ZUAH KEN/VOTE ZUAH SIN’ chijong ana koitel tei va chi ing. Kum 5 dan a kahtvei maimai inei uh, I VOTE ukhu amanpha petma a, igam leh inam tunding na ding a izah thei uleh ahampha ihi ding ua, ibiehna tawh jong kikal VOTE zuah ichinsawt laisie uh igam ah lei ngailou powder in imai tuam jel lai ding hi. ‘VOTE zuahsin, khelna ahi’ chi ilungtang ua atendet chieng in igam ilei hing pallun kia pan ding hi else we are doomed.